Ora e Tokes edhe ne Kosove

Ora e Tokës/ Earth Hour 2011 (EH 60 +)

2011-03-08T09:11:00.000-08:00

Në kuadër të fushatës globale "Ora e Tokës” - Earth Hour, organizuar nga Fondi Botëror për Mbrojtjen e Natyrës (WWF), më 26 Mars 2011 në ora 20:30, qytetet nga e gjithë bota do të fikin dritat e tyre për një orë për të dërguar një mesazh të fortë se është e mundur që të mirren masa konkrete kundër ngrohjes globale.

Fikja e dritave për një orë nuk është e mjaftueshme.

Këtë vit merrni vendime për masat konkrete që duhet të ndërmerren për të kontribuar në ruajtjen e planetit tonë!

Mos rrini në errësirë gjatë ORËS SË TOKËS, mendoni se çfarë tjetër mund të bëni pas këtij veprimi!

2010-04-01T09:16:00.000-07:00

“Ora e tokës” u shënua edhe në Prishtinë

2010-04-01T08:36:00.000-07:00

E diel 28 Mars 2010 12:14

Në kuadër të aktiviteteve të realizuara nga organizata më e madhe mjedisore në botë WWF (Fondi Ndërkombëtar për Natyrën), përkatësisht në kuadër të “Earth Hour 2010” në shumë qytete në mbarë botën u fikën dritat rreth një orë për të dhënë mesazhin e shfrytëzimit sa më racional të energjisë elektrike, si masë për mbrojtjen e planetit nga ngrohja globale dhe efektet e saj.

Edhe në Kosovë, për herë të parë u realizua shënimi i kësaj ngjarjeje, që është njëra ndër ngjarjet më të mëdha botërore për mbrojtjen e mjedisit “Earth Hour 2010” (“Ora e Tokës 2010”) nga Asociacioni për Kulturë, Edukim dhe Arsim (AKEA) dhe Shoqata Ekologjike “Eko Viciana”, të cilat qenë partnerë të WWF me bazë vullnetare dhe të cilat në kuadër të këtij projekti global përfaqësuan Kosovën.

Kështu, në sheshin “Nënë Tereza” në Prishtinë, në shenjë përkrahjeje dhe solidarizimi me aktivitetin në fjalë, nga ora 15:00 shumë qytetarë, kryesisht të rinj, nënshkruan në shenjë përkrahjeje dhe interesimi, aq më tepër për faktin se është hera e parë që panë një aktivitet të tillë.

Në emër të Asociacionit për Kulturë, Edukim dhe Arsim (AKEA), Mr. Rrahman Ferizi dha një tablo të përgjithshme mbi rëndësinë e “Earth Hour 2010” veçmas për shtetin tonë, ngase kjo është nisma e parë në vend e një projekti të tillë. Ai poashtu dhe tha se ky projekt, ndonëse i realizuar nga AKEA dhe “Eko Viciana” ka hasur edhe në përkrahje morale nga institucione tjera në vend.

Gjatë kohës së fikjes së dritave, nga ora 20:30 në po atë vend u ndezën qirinj në formë të hartës së Kosovës, në mes të të cilës po përmes qirinjve shënohej numri 60 (simbolika e 60 minutave të “Orës”).

Sipas zyrtarëve të organizatave në fjalë, ky aktivitet mëton të japë një mesazh për shfrytëzim racional të energjisë elektrike dhe sensibilizimin për efektet e saj në ngrohjen globale. Sipas tyre, rëndësia e këtij evenimenti është në simbolikën që shpreh ai për kursim dhe mbrojtje, si në planin mjedisor ashtu edhe në atë ekonomik dhe social, që janë baza të një zhvillimi të qëndrueshëm.

Me këtë rast qenë të pranishëm zyrtarë nga Komuna e Prishtinës, AKEA, Eko Viciana, përfaqësues të mediave si dhe shumë qytetarë.

Blerim Halili, Prishtine

"Ora e Tokës", manifestimi më i madh botëror kundër ndryshimeve klimatike

2010-04-01T08:30:00.000-07:00

E shtune 27 Mars 2010 23:35

Aksioni global "Ora e Tokës" (Earth Hour) do të zhvillohet sot për të katërtën herë, në orët lokale të shteteve (20:30), ku njerëzit në mbarë botën do të fikin dritat për një orë për të treguar solidaritet në luftën kundër ndryshimeve klimatike.

Me iniciativën e Fondit Botëror për Natyrën (WWF), këtë vit do të jenë 125 shtete, banorët e të cilëve do të fikin dritat, ndërkohë që vitin e kaluar ishin vetëm 88 vende.

Sekretari i përgjithshëm i Organizatës së Kombeve të Bashkuara, Ban Ki-moon deklaroi se ky do të jetë "manifestimi më i madh në luftën kundër ndryshimeve klimatike".

Nga Qyteti i Ndaluar në Pekin, në Piramidat e Egjiptit, në Fontanën Trevi në Romë, në Portën e Brandenburgut në Berlin e deri te Kulla Eiffel në Paris, në të paktën 1 200 qytete të njohura në të gjithë botën, ndriçimi do të pezullohet për një orë për të rritur vetëdijen e njerëzve për rëndësinë e problemeve që krijohen nga ndryshimet klimatike.

Kosova, Arabia Saudite, Kamboxhia, Ekuadori dhe Madagaskari do të jenë nga shtetet që për herë të parë do t'i bashkohen kësaj iniciative./www.mesazhi.com/